నకిలీ మందులకు ఇక చుక్కలే! అత్యంత కీలక ఔషధాలపై QR కోడ్ తప్పనిసరి చేసిన కేంద్రం.

నకిలీ మందులకు చెక్.. కీలక ఔషధాలపై QR కోడ్ తప్పనిసరి చేసిన కేంద్రం!

భారతదేశంలో ఔషధాల భద్రతను, నాణ్యతను పటిష్టం చేసే దిశగా కేంద్ర ఆరోగ్య, కుటుంబ సంక్షేమ మంత్రిత్వ శాఖ ఒక కీలక నిర్ణయం తీసుకుంది. ఔషధ సరఫరా వ్యవస్థను పారదర్శకంగా మార్చడమే లక్ష్యంగా, అత్యంత కీలకమైన మందుల ప్యాకేజింగ్‌పై QR కోడ్ లేదా బార్‌కోడ్‌ను తప్పనిసరి చేసింది. డ్రగ్ రూల్స్ 1945 నిబంధనల్లో సవరణలు చేస్తూ ఈ ఉత్తర్వులను జారీ చేసింది.

ఏయే మందులకు ఈ నిబంధన వర్తిస్తుంది?

కొత్త నిబంధనల ప్రకారం, ఈ కింది విభాగాలకు చెందిన మందులపై కచ్చితంగా QR కోడ్ ఉండాలి:

• అన్ని రకాల వ్యాక్సిన్‌లు.

• యాంటీమైక్రోబియల్ ఔషధాలు.

• క్యాన్సర్ నిరోధక (Anti-cancer) మందులు.

• నార్కోటిక్ డ్రగ్స్ అండ్ సైకోట్రోపిక్ సబ్స్టాన్సెస్ (NDPS) చట్టం కిందకు వచ్చే మందులు.

QR కోడ్‌లో ఏముంటుంది?

ఈ కోడ్‌ను స్కాన్ చేయడం ద్వారా వినియోగదారులు ఆ మందుకు సంబంధించిన సమగ్ర సమాచారాన్ని తెలుసుకోవచ్చు:

• మందు పేరు & బ్రాండ్ పేరు.

• తయారీ సంస్థ వివరాలు.

• బ్యాచ్ నంబర్, తయారీ తేదీ & గడువు తేదీ (Expiry Date).

• తయారీ లైసెన్స్ నంబర్.

ఈ నిర్ణయం వల్ల ప్రయోజనాలు:

గతంలో ఈ విధానం కేవలం టాప్ 300 బ్రాండ్లకు మాత్రమే పరిమితం కాగా, ఇప్పుడు దీనిని విస్తరించడం వల్ల నకిలీ మందుల విక్రయాలను సమర్థవంతంగా అరికట్టవచ్చు. దీనివల్ల మందు తయారీ దశ నుంచి రోగికి చేరే వరకు ప్రతి దశను ట్రాక్ చేయడం సులభమవుతుంది. ముఖ్యంగా, 'యాంటీమైక్రోబియల్ రెసిస్టెన్స్' (AMR) వంటి సమస్యలను తగ్గించడంలో ఇది కీలక పాత్ర పోషిస్తుంది.

అమలు తేదీలు:

ఔషధ కంపెనీలకు తగిన సమయం ఇచ్చేందుకు ప్రభుత్వం ఈ నిబంధనలను దశలవారీగా అమలు చేయనుంది:

1. వ్యాక్సిన్లు, క్యాన్సర్ మందులు, NDPS ఔషధాలు: 2027 జూలై 1 నుండి అమల్లోకి వస్తాయి.

2. యాంటీమైక్రోబియల్ మందులు: 2028 జూలై 1 నుండి అమల్లోకి వస్తాయి.