బరువు తగ్గించే GLP-1 మందుల దుర్వినియోగంపై కేంద్రం సీరియస్.. తప్పుడు ప్రచారాలపై కఠిన చర్యలు
స్థూలకాయ నివారణకు ఉపయోగిస్తున్న ఆధునిక GLP-1 ఆధారిత మందుల (సెమాగ్లుటైడ్, టిర్జెపాటైడ్) వాడకంపై కేంద్ర ప్రభుత్వం తీవ్ర హెచ్చరికలు జారీ చేసింది. సోషల్ మీడియా వేదికగా జరుగుతున్న తప్పుడు ప్రచారాలు, ఇన్ఫ్లుయెన్సర్ మార్కెటింగ్ మరియు పరోక్ష ప్రకటనలను అరికట్టడానికి సెంట్రల్ డ్రగ్స్ స్టాండర్డ్ కంట్రోల్ ఆర్గనైజేషన్ (CDSCO) రంగంలోకి దిగింది.
రాజ్యసభలో కేంద్ర ఆరోగ్య శాఖ సహాయ మంత్రి అనుప్రియా పటేల్ స్పష్టం చేస్తూ, ఈ మందులను కేవలం టైప్-2 మధుమేహం మరియు నిర్దిష్ట వైద్యపరమైన దీర్ఘకాలిక బరువు నియంత్రణ కోస మాత్రమే ఆమోదించినట్లు తెలిపారు. ఎలాంటి ప్రిస్క్రిప్షన్ లేకుండా వీటిని సాధారణ టానిక్లా ప్రచారం చేయడం చట్టవిరుద్ధమని హెచ్చరించారు.
ప్రధాన మార్గదర్శకాలు మరియు చర్యలు:
-
వైద్యుల పర్యవేక్షణ తప్పనిసరి: ఈ మందులను ఎండోక్రినాలజిస్టులు లేదా అర్హులైన వైద్యుల సూచన మేరకు మాత్రమే వాడాలి.
-
డిజిటల్ ప్రమోషన్లపై నిషేధం: ఫార్మా కంపెనీలు, వెల్నెస్ క్లినిక్లు అవగాహన పేరుతో చేసే పరోక్ష ప్రకటనలు, ఇన్ఫ్లుయెన్సర్ మార్కెటింగ్ను పూర్తిగా నిషేధించారు.
-
దేశవ్యాప్త తనిఖీలు: తయారీ కేంద్రాలు, ఆన్లైన్ ఫార్మసీలు, రిటైల్ షాపులు మరియు వెయిట్ లాస్ క్లినిక్లపై ప్రత్యేక నిఘా ఉంచి తనిఖీలు నిర్వహిస్తున్నారు. నిబంధనలు ఉల్లంఘిస్తే లైసెన్సులు రద్దు చేయడంతో పాటు చట్టపరమైన చర్యలు తీసుకోనున్నారు.
నిపుణుల హెచ్చరికల ప్రకారం, ఈ మందులు ప్రతి ఒక్కరికీ సురక్షితం కావు. కాబట్టి ప్రజలు స్వీయ వైద్యానికి (Self-medication) దూరంగా ఉండాలని ఆరోగ్య నిపుణులు సూచిస్తున్నారు.