ఏపీ అభివృద్ధికి కేంద్రం భారీగా నిధులు రూ.10,134 కోట్లు కేటాయింపు

ఆంధ్రప్రదేశ్‌ అభివృద్ధికి కేంద్రం పెద్దపీట: పార్లమెంట్‌లో కీలక వివరాల వెల్లడి

పార్లమెంట్‌ సమావేశాల్లో కేంద్ర ప్రభుత్వం ఆంధ్రప్రదేశ్‌కు సంబంధించిన టెలికాం, రైల్వే, మత్స్య, లాజిస్టిక్స్ రంగాల ప్రగతిపై స్పష్టమైన వివరాలు వెల్లడించింది. రాష్ట్ర అభివృద్ధే లక్ష్యంగా కేంద్ర మంత్రులు పలు కీలక ప్రకటనలు చేశారు.

• రైల్వే రికార్డు కేటాయింపులు: 2026-27 ఆర్థిక సంవత్సరానికి ఏపీ రైల్వే రంగానికి రూ.10,134 కోట్లు కేటాయించారు. ఇది 2009-14 సగటు కంటే 11 రెట్లు ఎక్కువ. ప్రస్తుతం రాష్ట్రంలో రూ.77,855 కోట్ల వ్యయంతో 12 కొత్త లైన్లు, 30 డబ్లింగ్ పనులు వేగంగా సాగుతున్నాయి. అమృత్ భారత్ పథకం కింద 74 స్టేషన్లను అభివృద్ధి చేస్తున్నారు.

• 4జీ మొబైల్ సేవలు: పీవీటీజీ గ్రామాల్లో డిజిటల్ కనెక్టివిటీని పెంచుతూ.. రాష్ట్రంలోని 4,543 ఆవాస ప్రాంతాల్లో ఇప్పటికే 3,231 గ్రామాలకు 4జీ సేవలు అందించినట్లు కేంద్రమంత్రి పెమ్మసాని చంద్రశేఖర్ తెలిపారు.

• మత్స్య ఎగుమతుల్లో నంబర్ వన్: దేశ సీఫూడ్ ఎగుమతులలో ఏపీ అగ్రస్థానంలో నిలిచింది. గడచిన ఐదేళ్లలో ఏపీ నుంచి 17.76 లక్షల టన్నుల ఎగుమతుల ద్వారా రూ.1.04 లక్షల కోట్ల ఆదాయం సమకూరిందని, దేశ మొత్తం వాటాలో ఇది 32.16% అని కేంద్రం తెలిపింది.

• విశాఖలో లాజిస్టిక్ పార్క్: విశాఖపట్నంలో ప్రతిష్టాత్మక మల్టీమోడల్ లాజిస్టిక్ పార్క్ ఏర్పాటుకు సంబంధించి డీపీఆర్ తయారీ పనులు కొనసాగుతున్నాయని, త్వరలోనే పనులు వేగవంతం కానున్నాయని కేంద్ర మంత్రి నితిన్ గడ్కరీ పేర్కొన్నారు.