అనాథ పిల్లలకు నెలకు రూ.4,000 సాయం - ఏపీ మిషన్ వాత్సల్య పథకం 2026

ఏపీ మిషన్ వాత్సల్య పథకం 2026: అనాథ పిల్లల భవిష్యత్తుకు భరోసా

ఆంధ్రప్రదేశ్ ప్రభుత్వం అనాథలు మరియు సంక్షోభంలో ఉన్న పిల్లల కోసం ప్రతిష్టాత్మకంగా 'మిషన్ వాత్సల్య' పథకాన్ని అమలు చేస్తోంది. తల్లిదండ్రులను కోల్పోయిన లేదా కష్టాల్లో ఉన్న చిన్నారుల చదువు, పోషణ నిమిత్తం ప్రభుత్వం ప్రతి నెలా ఆర్థిక సాయాన్ని అందిస్తోంది.

ఎవరికి వర్తిస్తుంది? (అర్హతలు)

ఈ పథకం కేవలం అనాథలకే కాకుండా, క్రింది విభాగాల వారికి కూడా వర్తిస్తుంది:

• తల్లిదండ్రులిద్దరూ లేదా ఎవరైనా ఒకరు లేని పిల్లలు.

• ప్రాణాంతక వ్యాధులతో బాధపడుతున్న తల్లిదండ్రుల పిల్లలు.

• యాసిడ్ బాధితుల పిల్లలు మరియు విడాకులు తీసుకున్న తల్లిదండ్రుల పిల్లలు.

• ప్రకృతి వైపరీత్యాల్లో తల్లిదండ్రులను కోల్పోయిన వారు.

• వయస్సు: 2026 మార్చి 31 నాటికి 18 ఏళ్లలోపు ఉండాలి.

• ఆదాయ పరిమితి: గ్రామీణ ప్రాంతాల్లో కుటుంబ వార్షిక ఆదాయం రూ. 72,000, పట్టణ ప్రాంతాల్లో రూ. 96,000 మించకూడదు.

పథకం విశేషాలు:

• ఆర్థిక సాయం: నెలకు రూ. 4,000 చొప్పున, ప్రతి ఆరు నెలలకు ఒకసారి రూ. 24,000 బ్యాంక్ ఖాతాలో జమ చేస్తారు.

• కాలపరిమితి: పిల్లలకు 18 ఏళ్లు నిండే వరకు ఈ సాయం అందుతుంది.

దరఖాస్తు ప్రక్రియ:

అర్హులైన వారు మీ ప్రాంతంలోని ఐసీడీఎస్ (ICDS) ప్రాజెక్టు కార్యాలయం, అంగన్‌వాడీ కార్యకర్తను లేదా సీడీపీవోను సంప్రదించాలి.

కావలసిన పత్రాలు:

• పిల్లల జనన ధ్రువీకరణ పత్రం.

• కులం, ఆదాయ ధ్రువీకరణ పత్రాలు.

• తల్లిదండ్రులు/సంరక్షకుల ఆధార్ కార్డు, రేషన్ కార్డు.

• పిల్లల బ్యాంక్ పాస్‌బుక్ కాపీ (అవసరమైన అన్ని పత్రాలపై గెజిటెడ్ అధికారి ధృవీకరణ ఉండాలి).

ప్రభుత్వ పాఠశాలలు మరియు కళాశాలల్లో చదువుతున్న పిల్లలకు ఈ పథకంలో ప్రాధాన్యత ఉంటుంది. అర్హులైన వారు ఈ అవకాశాన్ని సద్వినియోగం చేసుకోవాలని అధికారులు సూచిస్తున్నారు.